Médam, zé méssyé, la sosyété, koz èk mwin sé koz èk in kouyon mé sé o pyé d’lo mir k’i oi lo masson. Mézami mi panss zot la romarké koméla néna demoun néna bèl-bèl trousso la klé. Konm mwin zot i doi domann dann zot kèr an parmi toussa la klé koman i fé pou trouv lo bon klé pou rouvèr lo bon port. Mon sèl répons,sé a taton...Mwin l’avé trouv in bon solisyon, mark shak klé avèk in mark la pintir, mé oila lo problèm lé touzour san soslissyon, pars kan wi ariv dovan in port ou lé apré domandé :sé lo klé marké an rouz, sansa sète lé blé, sansa ankor sète la poin la mark dossi.. Pou finir wi tatone é la pa rar ké sé lo dèrnyé klé k’i rouvèr la port , sansa inn an parmi bann dèrnyé. Dan la vi galman lé parèye : néna in bonpé solisyon possib pou in problèm souvan défoi lo bon solisyon i ariv pa promyé kou mé kan ou la fine fé plizyèr zéssé. Alé ! Mi kite azot rofléshi la dsi é ni artrouv pli d’van. Sipétadyé.