Mézami, si zordi mi poz azot in késtyon sinp : « kossa i lé lo pilon ? kossa i lé lo kalou », mwin lé sirésèrtin in bonpé lé riskab poz azot késtyon. Zot i pé di par égzanp : « kossa i lé lo mortyé ? ». Zot i oi, sa lé riskab amenn anou lwin. Alor, alon kontante anou d’dir lo pilon sé lo galé avèk in trou fouyé d’dan pou pil zépiss é lo kalou sé lo galé borlamèr i sèrv pou pilé. Poitan i apèl pa li lo pilon !

Astèr pou arvnir dsi noute kozman, sa i rapèl amwin in n’ote kozman k’i di konmsa : « For an for néna son mète ! ». Do fé lé for, mé delo i tinn ali. Delo lé for mé dofé i transform ali an vapèr. Lo shien lé for, mé mon boute boi l’assé pou li. Donk nou va dir, boudikonte toute zafèr lé rolatif. Absoliman for, mi panss pa sa i égziss. Goliath té for, mé David la tyé ali kou d’galé épi in sinp pti flèsh..

Alé ! Mi kite azot rofléshir la dsi é mi di azot in n’afèr mwin la antann samdi soir dann in rényon kan kélk’in la di : « La viktoir bann shagossien, sé la viktoir po d’tèr konte po d’fèr ! » Lo po d’tèr sé in pèp pa tro nonbré é anpliss déporté. Lo po d’fèr sé la rényon dë gran péi, anglétèr épi zétazini, mi panss la vi va finir par amontre anou défoi, i ariv lo po d’tèr i bate lo po d’fèr.

A domin sipétadyé !