Kossa i lé sa d’apré zot ? Oussa i trouv in n’afèr konmsa ? Fransh vérité sa sé in n’afèr i roprézante bien in fèye vakoa. Zot i trouv pa ?Avèk in ranzé zépine dann milyé lo do, in ranzé in koté, in n’ote ranzé l’ote koté. Do koi bien pike oute min é anpliss do koi rèss dann la po sansa dan la shèr, é mi assir azot na pwinn gou d’ète piké konmsa.

Astèr i di li koupe troi koté é sa i vé dir li prézante plizyèr danzé pou sak lé vizé-l’agréssè si zot i vé-mé galman pou sak i agrèss lé riskab fé mal ali par li mèm. Défoi wi antann dir in moune sé in kouto i koupe dë koté-in kouto dë lam- é sa lé danzéré pars si li koupe dë koté li lé avèk ou san z ‘ète avèk ou tou an étan avèk ou é pou lo rèst alé débarbote aou… Souvan mi antann parl kouto détayan mé domaz mi oi pa tro kossa sa i vé dir. Dann mon idé mi fé lo raproshman avèk sak mwin la fine marke an-o la mé mwin lé sir d’rien.

Fitintan mi rapèl l’avé dmoune fran-demoune pou kissa la vérité néna in sèl koulèr, mé koméla lé shoz la shanz é la franshiz la fine trok lo pa avèk lintéré pèrsonèl é demoune la adapt azot avèk lo drol de monde nou la rante dedan firamézir prèss san rann anou konte.

Alé ! Mi kite azot rofléshir la dsi é ni retrouv pli dvan sipétadyé.