Mézami zot i koné dan la vi néna dë kalité d’moune, demoune fran ; sak i di la vérité néna in sèl koulèr épi demoune i ramass mantèr kissoi par gou, kissoi par intéré,kissoi mèm pou fèr léspor, in sorte zimnastik zot léspri… Le moune lé fran lé fran, mé demoune mantèr sa sé in traka pou zot mèm épi pou lé zote.

Laba dann Lalmagn néna in patoi i di konmsa mansonz la pate lé kourte é sa i vé dir in mantèr lé riskab d’ète amayé dann son prop manteri. Donk li pé fé trape ali par li-mèm pars li lé riskab obliye son prop mansonz. Konpran azot bien, si in moune i ramass mantèr dsi in n’afèr, i fo li manti toultan parèye avèk toulmoune mé si li adapte son kozman avèk inn, avèk in n’ote, épi in n’ote ankor, zot i konpran sa sé in zé danzéré.

Mé o fète, pou kossa ramass mantèr ? Lé si sinpe dir la vérité ! Zot i kroi sa zot ? Mwin mi kroi pa sa lé si sinp ké sa. Dabor défoi lo mansonz i pé z’ète lézitime pou pa gingn tro zannui, pou pa fèr annuir lé zot kissoi in dalon, in famiye. Dann droi pénal franssé ou néna lo droi mantir si dir la vérité i mète aou dann danzé.Dann in ka konmsa i fo pa prète sèrman sinploman… Pars la lé riskab fé annuir aou.

Mi koné pa kossa zot i panss de sa, mé mwin pèrsonèlman mi panss lé pa d’tro rofléshir la dsi.Alé !
Ni retrouv pli dvan sipétadyé.