Médam zé Méssyé, la sossyété zot i ansouvien lo tan l’avé lo pou. Sa té in problèm pou zabitan noute péi pars pou-la sa i grate la tète, é i rann oute voizinaz dézagréab. Pou konbate lo pou bonpé d’moune téi pass pétrol dan la tète épi téi antour lo koko d’tète avèk in shifon.

Sa lété vré kan l’avé pou vréman in linvazyonn pars li l’avé son sézon mé si lété pa son sézon bébète-la téi kite aou trankil é si lété pa son sézon l’avé pwinn zinssèk-la pou vréman. Toute fasson pou li pran dan la tète in marmaye téi fo l’avé shové, otroman konte pa dsi.

Astèr si ni arvir dsi noute kozman, konm dabitide dan la boush kréol sa i vé dir i fo pa alé rode dé shoz kan na pwin é konm mwin la marke an-o la na pwin lo pou dann tète prop. Sé pou sa k’i fo pa alé rode ali la- i fo pa alé rode kékshoz landroi wi trouv ar pali.

Alé ! Mi kite azot rofléshir la dsi é ni retrouv pli dvan, sipétadyé.