Mézami, sirésèrtin, sa la pa in kozman-ni in patoi-zot i antan toulézour.Mwin lé mèm sir bann zénèss koméla la pankor antann sa zamé. Mwin pèrsonèlman mwin la antann sa kan mwin lété in jenn marmaye téi pass son vakanss Sin-Lé,an famiye, dann lo kartyé troi lète.

Dan la kour, koté in gro pyé filao l’avé in kabane é la moityé té in kuizine la moityé téi ansèrv lojman in vyé péshèr. Son nom : Léon Boudiny Ernèst, gran amatèr d’ kou d’sèk dovan létèrnèl, shantèr kaptivan, é rakontèr.

Souvan li téi di kozman mwin la marke an-o la.Pou kossa li téi di sa ? Par rapor lo ronm ? Pa ditou pars lo mo ron dann sanss-la té pankor rante dann noute vokabilèr. In sanss ? Mwin la touzour rodé mé san trouvé. In plézantri ? A kou sir pars bonpé kozman i rante dann la lang kréol La Rényon an plézantan.

Dé foi zot i rèst dan la lang, défoi zot i fé in pti tour d’dan épi zot i taye la route. Malgré sa, mi konséye azot konète ali, pétète ansèrv ali, épi èm ali konm ni yèm noute lang é sa lé normal.

Alé ! Ni rotrouv pli dvan é a domin sipétadyé.