Médame zé Méssyé, la sossyété mwin lé sirésèrtin bonpé rantre zot i koné kozman-la pars néna lontan demoune i ansèrv ali. Inn fasson po dir d’kékshoz li lé pi dann laktyalité.

Mi koné in pé i di galman : « Arète fé lèv lo mor. » pou dir la mèm shoz. Biensir lé pa kan i parl d’in gayar zafèr, pars kan i parl d’in gayar zafèr, an zénéral i rode pa si sa la spassé dopi lontan, si lé pi dann laktyalité. An zénéral demoune i yèm bien kan i anparl kékshoz la spassé dopi lontan sirtou si sé in gayar zafèr.

Sak demoune i yèm pa sé kékshoz i mète pa zot anlèr, i fé pèrde azot la valèr,sansa la répitassiion. Poitan zot i koné dann in sossyété modèrn néna touzour inn-dé kadav dann plakar.Donk kékshoz i pé fèr lo tor si demoune i ariv a savoir..

La prèv déssèrtin zoinal lé éspéssyalizé dann l’ar salir bann pèrssonaz piblik é zot i anparl pars lo piblik ankéstyon i yèm bien lir bann nouvèl i Sali l’inn sansa l’ote, épi i noirssi zot kanar é zot fitir lé konm andikapBoudikonte shakinn i yèm pa kan i noirssi son kanar.

Si tèlman k’i rèss la pèrssone pou alé dovan tribinal pou amontr i roprosh azot dé shoz la zamé spassé. Défoi lo zoinal lé kondané.Défoi sé la pèrsone lo zoinal la mal parlé. Sa lé vyé konm lo monde é la pa koméla sa i sava fini.

Mi kite azot rofléshir la dsi é ni retrouv pli dvan sipétadyé.