Médame, Méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo vré masson. Mézami, ké zot i done kékshoz, sansa ke zot i rossoi, I fo porte antansion pars shakinn néna son vision dsi in n’afèr. Mi koné d’moun la fashé kan bann paran la partaz lo bien pars i pé ariv k’inn I majine son paran la fé proférans kont li é l’ote I pé pans lo mèm zafèr. Apré zot I koné sak I ariv ?La famiye I diviz otour d’in karé la tèr, sansa otour d’in batiman é lo bann paran téi kroi fé plézitr zot bann zanfan, I tape a koté san rand azot kont. Sa lé vré rante famiy, mé sa lé vré galman rante sinp frékantasyon, rant zami, dalon épi kamarade. Sé pou sa la vi sosyal lé si difisil pou améné. Mé zot i koné sa myé k’mwin é mi invite azot kant mèm bien rofléshi la dsi é ni artrouv pli d’van.Spétadyé