Mézami yèr nou la anparl kozman-la inportan konm zot i oi. Pou kossa mi di sa lé inportan ? Sinploman pars i pé pèrmète anou kontrol in pé nou réaksyon épi nout zémosyon boudikont, donk amorti in pé l’afèr. Mé si zot i rapèl bien, mwin la promète azot rakont zistoir madam Koutini. A ! madam Koutini ! Lété la madam méssyé Koutini bien sir, é lo méssyé an késtyon l’avé tout défo : té i falé oir koman li té i antropran son pov madam. Li té i jir sa, li téi roprosh alèl tout zafèr si tèlman demoun l’avé konm in pé pityé pou lo madam . In pé téi di : Ma pov madam koman wi fé pou suport in sovaz konmsa ?Mé madam –la , avèk son pti manyèr, k’ téi vé dir : « in kyète pa pou mwin, mi métriz la késtyon ! », èl téi réponn : « Koutini la touzour été konmsa mèm ! ».Tousa pou dir l’avé poin pèrsone i pé shan ali, é èl i fé avèk. Antrotan, mésyé avèk madam la fine alé, mé la métode lé valab.La pa sète « lo dsi fèye sonz »mé lé éfikass kant mèm. Alé ! Mi kite azot rofléshi la dsi é si zot néna in kanikrosh dan la vi, panss madam Koutini épi fé avèk konm i di.Ni artrouv pli d’van. Sipétadyé.