Néna in mo,dizon in kozman i rogagn favèr zordi :sé lo mo « sèryé ? ». Dann diksyonèr Alain Armand néna in sitassyon in lékrivèr dann tan lontan téi apèl Frèr Didier é kozman-la i di : « Papa mwin la besoin koz sèryé avèk ou ». Mézami in n’afèr konmsa i date pa d’yèr :étan marmaye mwin té i antann parl frèr Didier.

Dopi kékmoi kozman-la i ropran favèr dann konvèrssassion bann marmaye konm dann diskission bann gran moune é souvan dé foi lé konm in lintérogassion. Trozour mi antann in papi i koz èk son pti zanfan é i di ali : « Si wi ravaz pa mi fé rogaye sossiss onzèr ». Alor lo pti marmaye gran konm troi pom inn-dsi l’ote i di : « Sèryé ? » é toute sak té la d’pète a rir.

La prèv ké kan in kozman lé bon li lé kaziman imortèl é noute kozman zordi lé konmsa.

Alé ! Mi kite azot rofléshi dsi bann pti parol konmsa i rante konm kouto dann bèr noute konvèrssassion kréol é ni retrouv pli dvan sipétadyé.