Mézami mi sorte komanss lir in liv i di pou marmaye mé pou ma par mi oi sa sirtou konm in liv kiltirèl avèk in bonpé patoi an kéol épi an franssé-lo franssé sé la tradikssion lo patoi an kréol. Sé konmsa ké mwin la vi dann bann promyé paz noute patoi « shape an zourite » avèk son tradikssion « filer à l’anglaise »- i manke lo patoi dann la lang bann zanglé(zot i koné dopi la guèr d’san t’an bann zanglé avèk bann franssé i manz pa in grin d’sèl ansanm.) Alor bann zanglé i di « fil à la franssèz » -take french leave.

Mé kossasai védir pou nou ? ni pé dir sa i vé dir « shapé » sansa « filé » mé san fé oir aou tèl fasson ou lé pi la é demoune i oi pa toutsuite. Ni di « shape an zourite » : pou kossa ni di sa ? Pars pou sak i koné zourite i koné ossi li néna in lank noir é kan li larg son lank é ké ou la pa trape ali, kan la mèr i rodovien transparan lo zourit lé parti. Li la profite son lank zété pou disparète.

Mi trouv sa sé in bon kozman pars li di bien sak li vé dir. Mi kite azot rofléshir ladsi é ni retrouv pli d’van, sipétadyé.

NB. Lo liv mi anparl azot la parète dann bann zédission katrépiss.Li porte la signatir dë madam :Fabienne épi Flo épi Laurence lofis la lang an dalonaz.