Mézami souvan défoi marmaye La Rényon néna shové mayé.I pé di ossi lé anmélé.Sé kan i ariv pou démayé ké lo problèm i komanss pars i paré wi pé fèr sak wi vé pou démayé mé i ramaye ankor.

Mwin la antann dir in zour dann la matèrnité in marmaye tann lo shové la amayé é linfirmyèz la désside koup léspéss pti neu la aparète avèk in sizo… Mi panss pa sa lé vré pars bann zinfirmyèz lé konm nou. Zot i panss néna kékshoz konm in léspri dann sète afèr la é zot i pran prékossion.

In pé i di i fo atann in an avann koupe lo shové.D’ote i di i fo fèr inn promèss dovan la shapèl. D’ote ankor i fé in promèss dovan la vièrz noir. Antouléka i fo pa zoué linkrédil avèk sa pars toute i rotonm dsi lo marmaye. I paré antouléka !

Mwin sak mi di sé sak demoune la di amwin mé sirésèrtin konte pa dsi mwin pou koupe shové in marmaye kan la mayé... Sé pa ké mwin la pèr sé ké sinploman sé in sorte mistèr pou mwin é si pétète in zour mwin la défyé in vivan, mi panss pa m’a défyé in léspri.

Antouléka sé konmsa mi kalkil é mi lèss azot rofléshir la dsi é ni retrouv pli dvan, sipétadyé.