« Si wi yème pa ète tousèl, ou na ka vnir an parmi. » : in kozman pou la route.

Médam, zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami, mi panse dopi in an a popré bonpé d’moun i soufèr par raport zot vi sosyal la raptissi an rézon d’ sak lété avan. La vi sosyal, néna sak i yèm sa é néna sak i yèm pa sa ditou,néna sak i siporte in poin sé tou. Mwin, pèrsonèl, mi panse mi pé s’anpass de sa kissoi totalman, kissoi an parti :vré do vré, mwin néna si tèlman d’zafèr pou di avèk mwin.Ma vi sé in vré dyalog rant mwin épi mwin mèm. Mé mi doi dir in sinp konvèrsasion avèk in moun i pé déblok in sityasion i tourn an ron-in pé i di an boukl-dann mon tète. Alor,mi pans mèm mwin la bézoin lo gatir sosyal..Mwin la bézoin konm bonpé d’moun d’ète an parmi. Sa la pa éssansyèl sa ? Mi panse ké oui, é mi krin ké opliss i raptissi lo lien sosyal, opliss i raptissi nout fil la vi. Alé ! Mi kite azot rofléshi la dsi é ni artrouv pli d’van. Sipétadyé.