Mézami kozman-la sa in kozman i di amwin kékshoz. Shak foi mi trouv in moune mi di kozman-la kan i di amwin « koman i lé ». Mé si i domann amwin si mwin lé bien, mon réponss : « sé lo bien k’i fé défo »

Donk pou arvnir dsi mon kozman zot i konpran bien pou kossa i di sa épi kissa i di sa biensir. Kan wi komanss d’ète in pé azé wi di sa… Normal wi di pa sa étan marmaye. Pou koué wi di sa ? Sé pars kan ou la fine trape in sèrtin laz, néna touzour kékshoz i klosh pa. Konm mwin lé sète ané, dann douz moi mwin sar pi parèye-bann zané i pèz plizanpli lour. Douz moi i pèz pli lourd si la finissionn d’vi ké dsi lo komanssman, sansa lo milyé d’vi...

Mé sanm pou mwin ladan néna galman konm in kokètri, sirtou si ou lé an form épi wi vé souzantann laz i pèz dsi ou, é dsi oute santé... Alé oir lé pa si tèlman vré. Mé kossa noré a rodir ? La kokèteri lé pa in péshé, ni in défo, ni in krime. Antouléka si sé mon défo, mi doi dir azot mi yèm bien défo-la.

Alé ! A domin sipétadyé.