Mézami zot i koné bann békèr d’klé ? Sak i travaye o noir épi i toush in moné pou inn tash a fèr. Noute toute i koné sa la pa in n’afèr a fèr, sak i anpèsh pa in bonpé rante nou domann kou d’min o noir si tèlman bann règ travaye lé konpliké pou mète an plass. Kan ou lé pa in vré proféssyonèl.

Dann ma vi mwin la konète in bonpé d’moune téi travaye o noir, donk téi bèk la klé,pa toultan mé tazantan kant mèm sa i ariv… Mé néna d’ote sityassion lé pli trist ké sa. Yèr mwin la antann dann radion in madam la travaye in karyèr o noir.Pa pars èl la vouli, mé pars son patron la pa déklar aèl.

Zordi èl lé bien annuiyé : okin droi pou la rotrète,okin larzan dan la somenn, dann lo moi épi dan l’ané. Astèr i fo konte dsi la solidarité ! Kèl solidarité ? sa sé kékshoz wi bénéfissyé kan ou lé déza in pé an parmi la sossyété mé kan ou lé rojoté d’tou ? Oute kanar lé noir.

Alé ! mi domann azot pou rofléshir pou pa tonm dann in pyèz konmsa é ni artrouv pli dvan, sipétadyé.