Mézami mwin lé sirésèrtin bonpé rantre zot i koné patoi-la pars in mové labitide an parmi lo moune sé d’konporte azot an abizèr.

Mi rapèl in zistoir mon papa la rakonte anou, étan pti. Li l’avé zoinalyé é kan l’avé pwin travaye pou done azot pou fé sansa kan in pèryode mové tan téi ariv, li téi done ravaz son dé-troi travayèr… Sé konmsa k’in zour la plui la tonb plizyèr zour d’ran é kan l’arété, li la parti dsi son bitassion pou romète lé shoz an ord.

Mé wala kan li l’ariv dsi son bitassion li la romark toute in karo manyok lété dézékilibré. Kan li l’arash in pyé épi dé épi troi li la romarke l’avé pi d’manyok dann lo bann touf é lo dé-troi travayèr l’avé kite la plass apré zot forfé.

Konm koi souvan défoi kan i done in pyé, i pran lo karo é pou ma par mi invite azot a bien rofléshir la dsi pars sanb pou mwin sa sé dé shoz i ariv souvan : kan wi kroi fé plézir dmoune, lé pa rar, zot i anprofite pou roul aou dan la farine.

Alé ! ni artrouv pli dvan, sipétadyé.