Mézami in far-far kossa i lé ? Sa in sorte gronyé demoune téi konsèrv zot rézèrv mayi, sansa zot somanss, sansa la rékolt pistash, pom-tèr toussala sansa ankor si sé in létazèr dann la kuizine piman konfi, zinzanm, épi toute kouyonade i done lo gou pou manzé é i aranz bien la boush.

Astèr si ni anparl sak ni apèl in gronyé… Figuire azot fitintan kan Paul Vergès lété dann la klandéstinité zandarm la antann dir lo dirizan lété dann la Plène dé kaf dann i rényon avèk kamarade. Pétète lété vré, pétète lété pa, mé zandarm la rante dann in kaz épi zot la pa trouv arien. Mèm zot la monte dann far-far pou rode Paul san trouvé…

Donk zot la pran zot kat-kate épi zot la parti pou alé rode Paul ayèr san sikssé bien antandi. Mé si ,i anparl ankor lo afr-far sé pou dir sa lété in gayar landroi dann bann kaz lontan é sirtou in bon land roi pou marmaye kashyété kékshoz k’i fé ké lakaze lontan lété in landroi marmaye téi san azot bien. Domaz sa lé fine alé pars konmsa mwin téi konpran la vi.

Alé ! ni artrouv pli dvan sipétadyé.