Mézami dabitide prèss toulmoune i di : « lo méyèr lé pou in pti zanfan sé dolé son momon. » Ssi tèlman ké bann fam-saz épi bann doktèr i konsèye bann madam done zot prop lé zot pti baba. Pou kossa i konsèye sa ?Pars sé sak néna d’myé pou lo zanfan kissoi konm nouritir, kissoi pou lite kont la maladi si tèlman néna zantikor dann lé lo momon.

Sa lé bien vré mé antanssyon si lo lé lé kontrayé ? Kossa sa i vé dir. Sa i vé dir tazantan lo lé lo momon i akorde pa avèk la santé lo marmaye.Si tèlman lontan lo bébé té i pran son lé avèk in nouriss. I paré dann tan lésklavaz la momon téi done pa son lé son zanfan é téi fé toute pou arète la monté d’lé é l’avé touzour in fanm zésklav té i vienn akoushé épi téi fé tète son prop zanfan avèk lo zanfan la métrèss ? Sé pou sa bonpé blan l’avé frèr d’lé sansa sèr d’lé.

Mé antanssion, i fo pa in momon lé kontraryé pars lo lé lé pa bon kalité é lo zanfan i grandi pa bien si tèlman lo lé pa bon pou lo marmaye, pa assé nourissan, pètète avèk bann tokssine dodan, si tèlman i mète lo bébé an danzé… Mi souvien kan mwin lété bébé mon momon l’avé bonpé d’lé é bone kalité é noute voizine l’avé mové lé donk li la tète in koté mwin in koté é li la pran in bon dépar dan la vi.

Mé wala in guérissèr la di i fo pa lo marmaye i kontinyé tète dolé la pa son momon. Donk li l’arété é aprésa li la pass lote koté la vi. Mi vann azot sa konm mwin l’ashté é ni retrouv pli dvan sipétadyé.