Opliss i sava,opliss lo tan i pass, opliss mi antann demoun i koné tout sort zafèr-dizon, i koné kaziman tout dsi toutt. Poitan sanm pou moin opliss lo tan i pass opliss lé shoz i vien konpliké ; Mèm la syans néna difikilté par sa. In tan demoun téi kroi momandoné sar possib monté romonté tout zafèr pars l’Om-avèk in gran O- nora trouv lo tik tak. Astèr i doute , astèr néna doutans é lé pa li mové... Alon mète in pé la syans de koté, é alon intérèss anou lo ka demoun ordinèr : demoun ordinèr, pars zot i pé trouv in pli kouyon sansa in pli kouyone ké zot, i panss zot i koné tout t zafèr dsi toutt é alé pa di azot : « Tienbo in kou, ni koné pa toutt é nou lé loinn konète toutt ». Mi parl pa zot la réponss zot i sava gingn an rotour, pars réponss konmsa i anfléri dann toutt landroi néna d’moun. Souvan dé foi, mi di la kantité la konésans lo moun i goumant zour an zour, mé limanité lé ankor loin asplik toutt zafèr. La prève, in sinp pti virus i rann tout lo moun la syans kouyon. Parl pi nou, lo bann ti kolon. Alor, mésyé sansa madam Zésétou, i vo myé rèss sinp, konète sak ni koné, rokonète sak ni koné pa pars néna bien dé l’androi nou lé konm zéro la gosh in shif. Ni artrouv pli d’van, sipétadyé.