L’Inde tout l’moune i dovré konète sé in grann puissans ékonomik épi militèr dann loséan indien é lo péi néna bon rolassion avèk la Répiblik Maurice dopi in bon koupe de tan .

Bien antandi laba Maurice banna la anparl bonpé bann négossyassion rante La Grann Bretagne, la répiblik Maurice-avèk lé zétazini apré sirvèye toussala. Pou lopinyon Maurice bann négossyasision i doi déboush avèk la souvrèneté d’ Maurice dsi Lé Chagos et pou lopinion rényonèz in promyé pa an avan pou lo rotour bann chagossien dann zot péi natal-dopi pliss sinkantan zot lété déporté dann bann péi inkonu dann lo pir kondission matèryèl…L’Inde son koté la pa manke signal li ossi lé la.

Alon roparl Maurice épi l’Inde : lo zour Maurice néna la souvrènté dsu Chagos li nora plis dé milion d’km2 la mèr épi li va komanss dopi bannzil Maskarègne ziska lo sid la Répiblik indienne, avèk anpliss in grann baz militèr dsi lil Diégo Garcia… La pa bézoin ésplike anou tro lontan pou nou konprann avèk in boulvèrsman konmsa l’oséan indien sar pi parèye ké li lété kan la GB épi z’USA téi règn an mète dsi noute loséan indien.

In sityassion konmsa i vo in-dé kado é sé konmsa ké l’Inde la modèrniz Agalega épi la fé toute sak lé possib pou répar bann déga Chido la fé- parèye i konte pi bann gran zinvèstisman L’Inde la fé dann Maurice é zordi ankor i sorte promète rofé limèb lo parlman maurissien. In rogré pou nou linkroiyab diplomassi lo gouvèrnman franssé épi son mépri par rapor bannzil loséan indien arzouté avèk noute bordaz dann la COI.

Mi arète tèrla mé i fo ni gnor pa in bonpé zafèr l’apré spass dann loséan indien é si La franss lé avèg nou la pa bézoin fèrm noute zyé. A bon antandèr salu !