La-ba, dan la Frans, la révolision i donn lo grin dépi 1789. Dann la nui 4 aout, mèm ané, l’Assemblée nationale Constituante la désid aboli lo bann privilèj. Solman, lo tan i pass épi i tard pou aboli lésklavaz dann bann koloni... Rienk Lané 1794, lo 4 févriyé, la Convention la désid aboli lésklavaz dann bann koloni. Aprésa, la atann ankor dë z’an avan lo Directoire i anvoy Baco avèk Burnel pou fé aplik so loi.

Dépi moi d’séktanm 1794, bann blan i koné la fine vot labolisyon. Sa in n’afèr zot i vé pa akoz zot la pèr sa i mèt dézord dan la koloni, épi i mèt azot o flan vik la pa prévi dédomaz azot. Spandan, zot i oi i bouz pa, alor zot i pans gouvèrnman la oubli azot. Kan zot i aprann lo Directoire la désid anvoy in mission pou aboli lésklavaz, zot pti pé d’san i bouye, zot lé paré pou rofizé.

Baco avèk Burnel, i ariv lo 18 moi d’juin dann l’il de Frans (Maurice té i apèl konmsa) avèk 2200 solda épi in komandan i apèl Magallon. Larmé i vann la kours tout suit, i lès bann gard nasyonal fèrm azot dan la kazèrn. Troi zour aprésa, lo bann blan, i mèt lé dé boug dann in bato, "Le Moineau". Déor !
Banna la mèm pa poz lo pyé La Rénion. L’abolisyon la manké. Nou la pass koté in bon réform.

Justin