Kan l’ariv la révolïsion 1789, bann révolïsionèr la shanj in pë tout nom téi rapèl tro lo roi. Sé konm sa k’in zour, zot la désid arbatiz l’île Bourbon ; la nonm alï La Réunion. L’été lë 19/03/1793.

Akoz la Réunion, akoz pa in n’ot nom ? La Réunion té in mo an vog dann tan-la. Navé in loge bann franc maçon téi apèl konmsa dann Paris, épi "La Réunion" sa i vé dir la koloni i vé viv ansanm-avèk la Frans.

Solman nou la mank apèl "jemmapes" akoz in boug té i apèl Beurnouville, lavé fé in pé tout gèr, té vé ki batiz anou konmsa. Li la ékri sa dann in lèt.
I prétan dir, kan Monge, lo boug té ministr bann koloni, la vï Jemmapes, li la tras in tré dsï épi li la ékri sï lo bor lo papié "réunion". Kossa sa i vé dir ? I vé dir lï nora voulï fèr in rénion pou diskité ?
I vé dir in n’ot afèr ? Ziska zordï, i koné pa.
Ni koné solman lo nom-la, nou la gingn sa in 19 mars konm nou la vnï départman in 19 mars 1946.

Justin