Lé ga ! M’a dir azot in n’afèr ? Sa nout listoir-la, sa kékshoz i fo ni aprann. Pars, konm di lo kont, in zour li ratrap anou, san k’ni atann. Zordi, la késtyonn lémigrasyon l’apré trap anou, mé dizon, la pa solman la késtyonn lémigrasyon, sé nout listoir dopi 1963 ki rapèl anou son légzistans. Kosa mi vé dir par la ?

Dabor nana listoir bann zanfan déporté dan la Creuse épi dan d’ot kartyé la Frans ousa na poin tro d’moun, é an plis ké sa, demoun i kit landroi pou alé an vil. Dabor na sa ! Mé pa solman sa : nana tout in tralé bann Rényonèz la gingn in formasyon pou alé travay konm bone dan bann famiy pou konkirans bann bone éspaniol é pétèt galman pou toush moin ankor. Aprésa nana tout bann moun la parti travay dann PTT, la SNCF épi dan d’ot gran lantropriz... Pa konm patron, pa konm kad, mé konm in bann ti kolon san pour san.

Mé pou kosa la désid anvoy bann Rényoné la-ba ? Pars la démografi té tro for ? Non va ! Pou in rézon politik. Pou kosa in rézon politik ? Pars té i falé vid lo péi son zénès, konm sa afébli an mèm tan Parti kominis. Arzout èk sa, la fé la frod, la vyolans bann nèrvi é bann fors dézord pou falsifyé lo sifraz inivèrsèl. Na ankor d’ot solisyon : goumant zalokasyon, anbosh fonksyonèr, fé in léspès réform agrèr pou goumant lo nonm plantèr moiyin... Si zot i vé, la lis lé long, mé tout sak té i fé té solman pou bar la rout lotonomi, bar la rout Parti kominis.

Mi lès azot mazine tousala, é lo rès. Mé sirtou, mi lans in apèl pou aprann a konèt nout listoir, sirtou fé lo bilan bann zané 1963 ziska 1981. Sa lé inportan pou nou Rényoné.

Nb : Pars lété galman la péryod rézistans nout pèp é nout lite pou lotonomi.

 Justin