Mésyé, médam, la sosyété,
si mi domann azot pou kosa nout kann lé dann difikilté, mi pans shakinn rant zot nora son répons. Si mi domann azot si plantasyon kann lé riskab disparète dann péïzaz l’agrikiltir nout péi, moin lé sir zot va donn amoin zot répons : pou in pé sar oui, pou d’ot sar non mé sré domaz nou kréol rényoné nou noré poin in répons dsi in késtyon konmsala.
Astèr si mi di azot dopi moin lagingn mon konésans moin la touzour konète demoun apré bataye pou sèye sov plantasyon kann isi La Rényon. Moin lé fine dir é pa arienk in kou, kan moin lété pti, mi souvien bien in diskisyon rant DrRaymond Vergès épi mon papa dsi kann. Mon papa téi di doktèr-la, li lé fatgé lizinyé i pèye ali son kann an shikète : zordi promyé l’avanns, dan dé-troi moi dézyèm l’avans, apré ristourn dsi lalkol, apré ankor ristourn dsi lo ronm é lo pèyeman téi trènn konmsa dsi dé z’an, défoi plis.

Donk mon papa téi di avèk doktèr : i fo arète èk sa, épi ashté mon kann in poin sé toué fini avèk sa. Lo doktèr yéi konpran lo danzéré lo kozman téi réponn ali : sa lé pa bon sa ! Kann sé in kiltir pou l’avnir.I pé tir ladan in kantité produi donk lo plantèr i doi pa priva li so bann rishèss la…
L’ané 1969, virapoullé avèk la fédékane la désid lo plantèr va vann son kann lizinyé. Tout son kann san rode sak lizinyé va fé avèk lo kann. Zour-la Virapoullé épi Fédékane la tir in bal dann pyé bann plantèr. Zour-la la ronons la plipar bann rishèss nout kann. Zour-la in gran malèr l’arivé pars zour-la la donn lo droi d’vi éd’mor dsi nout plantasyon kane, dsi bann plantèr kann, é dsi tout sak téi viv dsi so rishèss-la.
Kan mi pans lo sor bann plantèr kann, mi pans los or bann rényoné, los or nout lékonomi posib. Mi pans kozman rant mo papa épi Dr Raymond Vèrgès, in gran bonome asuréman é bien antandi bann médokr la pa ékout ali.

NB Mi rapèl azot kant mèm kozman pou la rout zoinal zordi di konmsa : la pa lo zour in fèye i tonm dann lo li pouri ! in bon lilistrasyon avèkproblèm kann. Zot i pans pa ?