La pa mantèr, moin lé près sir la mazorité dmoun i koné date-la dann listoir La Rénion. Toulmoun i koné issi lavé lésklavaz épi la mète in poin final avèk sa lané 1848, lo vin Désanm. Moin lé près sir galman demoun i koné Sarda Garriga la vni shé nou pou fé aplik in dékré pou aboli lésklavaz.

Si sak mi di lé vré pou vréman, sa in nouvèl lé inportan pou nout péi, épi pou nout pèp akoz mi ansouvien, fit’in tan, la mazorité dmoun téi koné pa sa. Dabor téi amontr pa sa lékol, épi la plipar dmoun téi sava pa lo lékol konm ki fo. Épi, 20 Désanm 1848, sa in date in bonpé dmoun, sirtou bann ofisiè, la vouli kamouf sa.

Zot i souvien kan la sèy fé la fète létchi so zour-la. Sa la séy fé Sinni, Auguste Legros té lo mèr, épi Victoria lété son dalon. Zot i souvien ankor kan lévèk La Rénion la sèy di zour-la sé la fète lo bienéré Scubilion. Sa sé la vérité mèm. É moin lé sir bann zarboutan nout kiltir, sak lé mor zordi, i doi rotourn tou lé sans dann z’ot tonm, kan zot i mazine in nafèr konmsa.

Lé ga, si domoun lavé pa dréssé, issi La Rénion, noré pi anparl lo vin Désanm-la. Té fini avèk sa. Tansion pangar, nou la pas pré !

Justin