Si, i donn amoin dé san éro ! Konmsa, toudinkou, san k’moin la domandé, san k’moin la fé kékshoz pou gingné ! Kosa moin noré maziné ? Lé pa défandi kalkilé ? Donkalor, moin lé a dmandé :

Promié zafèr, moin noré pèr la bank i poz son pate déssi. Pars i plézant pa avèk la bank : si out kont lé moindroman in pé dann rouj, zot i jènn pa zot, zot i karsèr lo larzan pou zot é sé konmsi ou la pa gingn aryin. Oui, mon kouzin !

Mon dézyèm réfléksion sé pou ésèy konprann pou kosa toudinkou i donn amoin sa, pars la pa dopi zordi solman, ni dopi yèr mi gingn pa zoinn lé dé bout par l’milié, é moin l’apré manz mon mizèr. Alor, mi domann, dann mon kèr si noré poin in zéléksion san tardé é si lé pa apré ésèy ashté mon biltinn vote. Zot i di pa sré possib, zot ? Sré possib, mé sré pa zoli !

Épi, konm mon tète lé pa tro vide, mi ansouvien Sarko la promète goumant in pé, firamézir, pti larzan bann vié, bann shomèr, bann andikap, ziska pèrmète azot an avoir lo pourkoi pou an avoir in vi korèk !

Mé donn in moné d’moun in foi tou lé san-sète an, i ansèrv de riyin, i roganiz pa in vi sanm sa... Konm di lo patoi, èk sa, i sava pa la gar !

Justin