Yèr matin kan mi ékout radyo, mi aprann in n’afèr mi trouv lé inportan késtyonn rosiklaj déshé. Biensir l’afèr tèl ké li lé i konsèrn pa La Rényon dirèktoman mél o prinsip li poz, sanm pou moin, sa in kékshoz bien valab.

Somenn isi nou la parl rosiklaj bann boutèye plastik dann l’Inn pou fé la rout ? Astèr ni sava anparl rosiklaz bann kokiy moul. Mi pans zot la antann parlé la foir la vil Lille : sa sé in foir i dir in vikind, in bonpé d’moun i vien épi banna i manz moul an kantité. In vikind, bann réstoran i fé kui par-la désan tone moul.

Kosa téi fé avèk sa avan ? Té i mète la voiri, in poin sé tou. So kou isi la déside fé karlaz ansanm… In pti l’antropriz la invant in tik-tak pou fé karo avèk lo bann kokiy. Avèk lo dé san tone kokiy i sava fé vin mil mète karé karo. La pa bokou si zot i vé, mé kant mèm ala in moiyin pou rosikl désan tone déshé é sa lé myé ké arien, mi pans.

Sanm pou moin, ala in bon réaksyon pou évite sharj la voiri épi gaspiye la natir. Si isi nou na poin kokiy an éstok konmsa, nou néna d’ot shoz é sa i doi pèrmète anou rant dann la dans lo rosiklaz é sa sé in bon n’afèr pou évite maltrète la natir : kisoi tout la vèrdir nout natir tropikal i produi dann in sézon, kisoi la bagass, zanvlop kann, fèye kann déshé demoun épi tout sort d’ot zafèr.

Moin la fine antann parlé laba dann la suisse banna, dann bann z’antropriz zot la monté i rosikl ziska soisant pour san bann déshé. San plézanté lé ga, sak lé posib shé lé zot lé posib osi shé nou é sa va évite anou kontinyé fé lo gaspiyaz bann rishèss i pé ansèrv anou.