Lé pli fasil dépansé ké fé rant l’arzan, é lé pli fasil fé dépans lé z’ot ké tir son prop larzan. Sa in kozman i antan souvan-défoi. Sa i pé ète vré, konm pa... suivan lo ka. Mé, touléka, pou l’Etat, sanm pou moin, sa lé vré.
Poitan, sa lé ékri dann lo kode de loi lo bann loi, donkalor dann la konstitisyon la France. Mé mèm si sa lé ékri, i ariv k’i réspèk pa, é kan ou i réklam, i anvoy aou dingué, konm par ébzanp pou Konsèy zénéral La Rényon ; kan la prézidant la domann la ministrèz l’outre-mèr kansa l’Etat i pans ranbours sak li doi, èl la anvoy baladé. Méssyé Fillon ossi l’avé anvoy in départman baladé, la pa anpèsh Konsèy d’État kondane ali.
I prétan, zordi i doi Konsèy zénéral par-la troi-san-sinkant milyon l’éro. Noré d’koi pèy la mityèl pou tout bann vyé k’i gingn pa. Noré d’koi ossi pou pèy bann moun pou okip bann vyé moun. Épi, pou fé fas in pé tout dépans sosyal bann moun la politik gouvèrnman la mète dann pli gran l’okisité. Alor kossa i pé dir an plis si in n’afèr konmsa ? I pé dir nana in loi désantralizasyon, in bon loi si lé apliké konm k’i fo. É si lé pa apliké konm k’i fo, i fo shanj sak i réspèk pa léspri la loi. 2012, nora l’okazyon pou fé sa.

Justin