Sak mi koné sé k’tazantan kan mwin lé anparmi in foul de moune, mi domann amwin kissa i apartien bann dis pour san pli rish donk kissa la profite léshèl la néokolonizassion pou fèr zot bèr é i mank pa, shak foi mi di an mwin-mèm si la loi 19 mars 1946 sé in loi d’égalité, alor li lé mal nomé pars sré plito in loi d’inégalité i fodré dir.

Mi rogard ossi si néna la katégori sak i fé parti lo trann-sis sansa lo karant pour san dmoune pov donk bordé par lo sistèm pou ète lo moune atèr i mank pa dann nout sossyété rényonèz… firamézir mi rofléshi dsi lo sistèm départmantalist épi mon konklizyon sé ké li sar zamé in loi d’égalité é lo tan nora bo passé nout sossyété sar touzour inégal é sar touzour divizé rant sak néna lo pourkoi an kantité é sak na pwin son pourkoi zamé.

A toute bann promèss i rovien dann mon tète pou dir : mi paryé in mèrl blan ké la mizèr i sava pa disparète konm par majigador d’issi lané 2030. Apré mi di sa la pa in paryaz pou fèr mé i fo trouv bann solission. Solission ? Kan dann l’ané 1959 nout parti la réklam lotonomi, sa la fé kriye in pé. Son mo d’orde lété déformé. Kan l’ariv la loi d’la réjyonalizassion nout parti la di sa la pa la loi k’va amène nout dévlopman épi la viktoir kont la mizèr épi la viktoir kont linzistiss. Laba dann Pari banna téi kroi mé dopi 1981 ziska2026 sa i fé 45 zané é nou lé touzour landroi nout tout i koné.

Konm lo shantèr i di : lo tan la passé dann lorloz é bann zobzéktif mèm fèb sar pa atin pars nout sistèm ni viv dodan li vé pa sa é lo gouvèrnman gosh konùm droite li vé pa dsa non pli. Bann zénérassion i va i vien mé bann zobzéktif sinp lé pa atin é sarpa atin si lé shoz i kontinyé konmsa.

A bon antandèr salu !

Justin