I fo dir, boug-la la pa ninport ki sa. Li la fé in linvansion i kont dann nout l’istoir : li la gonn la vaniy. Mèm bann savan, bann plantèr kalifié lavé pa niabou fé sa. Tan-la, la vaniy té i ansèrv arienk konm flèr akoz téi gingn pa fé donn ali bann gouss.

Marmay-la lavé arienk douzan : in pti zésklav té i suiv son mètr partou dann zardin, té i aprann avèk li bann sékré dsi bann plante. Koman li la trouv sa ? Difisil pou konète : dizon lo déstin la donn ali la min pou trouv moiyin fé in n’afèr konmsa : in métode sinp, i mank pa, i pé fé an kantité.

Kossa li la gingn avèk sa : larzan, la tèr, lamitié, la rokonésans ? Arien di tou !
Mèm son libèrté, li la gingn sa, troi moi par-la avan lésklavaz té aboli pou tout bann zésklav. Lo 22 séktanm 1848, la donn ali son libèrté. Azout ankor la donn ali lo nom Albius ! Si sa la pa pou gaskone ali, alor dizon kréol i koné pi kossa i lé kass lé kui.
Lo rès son vi té konm in mové rèv : li la konète la zol, la mizèr, la maladi, li la mor tousèl konm in vyé shien.

Lané ki vien nora 160 lané li la gingn son libèrté. Mi éspèr nou va fé in gran fète pou li. Li mérit pou vréman, boug-la la mète La Rénion anlèr !

Justin