(Page 16)

3.000 moun dann somin samdi. Wa di in pé mwin. Wa di in pé plis. I ral pa lo trin, i rofiz noyé dann réform sarzèr d’lo. Mé manif la té zis in kou d’ésé. Sé pa si na konèt lo minm mouvman kontèstation nou la koni, sanm 15.000, 20.000 manifèstan an kolèr.

Tout bann koulèr syndikal la fane dopi anlèr la ri d’Pari ziska la Préféktir pou mann lo préfé si li lé pa o 35 èr, in rankont pou dépoz inn lèt.
Ala lané i komans é i promé. Akoz fo pa krwar La Rénion, dann Départman l’Outre-Mer, i rèss ryink in kiltir na bès la tèt, tak la gèl, travayé. Si ankor navé travay...

Na inn ot kiltir lo travay èk réspé domoun i fé ni tyinbo drwat : batay syndikal. Si tann moun plitok alé la plaz ou manz dan lé o, in gro samdi, la dsann dann go salèr Sinn-Ni, sék la lit la pa fini, na ankor somin pou trasé si la rout lo progré. Mé avann alé pli lwin, fo anbar so bann lakaparèr i aranz pou tout pou nou an pli pti, an pli frazil, an pli sèr, fo anbar somin zot i fé bat anou arièr.

Épi, an fas so kiltir syndikal, na sak i fé tout pou kas ali. Kisa la di réprésion syndikal la fini ? Mé koman krwar domoun va tak zot gèl pou krèv boush rouvèrt ?

Justin