Oté

70 % bann post résponsab dann privé lé okipé par d’moun déor

Antandi dann télé :

Justin / 17 séptanm 2020

JPEG - 43.6 ko

Mézami, mi koné pa si zot la fine romark in n’afèr : kan i parl dsi lanploi isi La Rényon dann télé, momandoné néna konm in ékspate i apèl pou di son poinnvizé dsi la késtyon é la plipar d’tan ou i antann ali dir : si i rézèrv l’anploi l’outromèr pou bann moun i arèss dann l’outromèr i fo pa lèss banna vnir travaye dan La frans. In késtyonn lozik d’apré sak i paré !

Mèrkrédi té apré anparl sa é lo téléfonèr-konm moin la di azot in l’ékspate-la komans par dir sak i intérèss lo bann patron sé la kapasité d’la pèrsone, pa l’androi li sort ni la koulèr son po. Ni koné sa lé pa vré, mé pass la dsi, la krash la pa shèr. Aprésa lo moun la di kan li sava dann bann grann vil kisoi Paris, kisoi Nantes, li oi bonpé demoun l’outromèr l’apré travaye.

Donk si i rézèrv pou bann moun l’outromèr l’anploi dann zot basin l’anploi, i fo rézèrv l’anploi an Frans pou bann zégzagono. Oplis la kouyonad lé bèl, oplis i di sa avèk aplon é moin lé sir in proshène foi nora in moun va trouv largiman-la lé doss épi va roprann sa pou son kont.

An parlan l’anploi dann privé, d’apré sak moin la antann néna 70 % bann post résponsab lé okipé par bannmoun déor. Mi koné pa si lé vré, mé an touléka néna in bonpé é bann rényoné kan zot i vé travaye La Rényon dan l’ankadroman épi dann privé, la plipar d’tan na poin plass pou zot ladan .

Pou kosa ? Pars néna pli konpétan ké lu ? Mi pans pa, é mi pans mèm konm néna bonpé d’moun diplomé, néna rényoné i pé z’ète formé pou okip bann post résponsab isi La Rényon mé la pa lo shoi bann l’antropriz i fé. Mi pans banna i travaye an rézo é la plipar d’tan zot rézo i komans landroi zot i sort é i ariv ziska isi. Sé pou sa lo rényoné néna la kapasité pou okip in post résponsab, la plipar d’tan li gard dann in trou.