Ala in kozman mi sort lir dsi bann rézo sosyal. Moin la roprann ali par bout. Pou kosa ? Dabor pars sak li pans rozoinn sak mi pans dsi plizyèr poin é mi pans tout demoun néna bone volonté épi konm k’i diré lo sans l’intéré zénéral nout péi i doi pans in pé konmsa.

Alon fé in sipozisyon : :
L’aviyon, bato i rant pi isi La rényon, :
Ousa i lé karo mayi, do ri ousa i lé ? La farine ousa i lé, Ousa i lé manzé ?
La ni doi pran konsyans larzan i manz pa,
L’imèb i nouri pan ou,
Ni doi an avoir nout manzé shé nou.
La sékirité alimantèr sa lé inportan,
La sékirité énèrzétik galman lé inportan,
San agard nout bann voizin, san z’ète dépandan par raport léstèryèr,
Sé katastrof-la nou l’apré rogard arivé. »
Aprésa lo moun i di ankor : alon planté pou nou manzé toutsuitman.

Biensir moun-la la pa dann nout parti pars li di galman désèrtènn shoz i akord pas an pour san avèk nout bann mo d’ord anou. Solman, dann son kozman néna in bann vérité é mi pans néna in bonpé d’moun i pans konmsa. I pans, i fini roganiz anou pou an avoir a boir épi a manzé san konté nout l’otonomi énèrzétik.