Olivier Bancoult, lo rézistan shagossien, la rakont koman bann solda z’anglé ; la-ba Diégo Garcia, la gaz bann shien. La mète bann zanimo dann in kalorifèr épi la mète an marsh dé motèr pou touf lo shien bann demoun la-ba, avèk l’oxide karbone. Lé normal ! Lé bon sa ! Té i falé fé sa ! Pou la défans lo mond lib.
Mi sort lir, la-ba dann Kanada, in sosyété dann lo tourism la fé tyé kou d’kouto épi kou d’fizy in santène lo shien Husky, pars l’avé pi bézoin azot pou fé promène demoun dann tréno. I paré la fé in karnaz. Bin té i fo fé sa ! Pars apré zé-zolinpik l’ivèr, l’avé pi d’moun an kantité pou fé bate karé. L’avé bézoin fé sa pou défann lo to d’profi. Sa mèm bon loi sistèm kapitalis !
In moun Sin-Pol la tiliz in shien pou fé z’apa pou trap rekin. I fé pa in n’afèr konmsa ! Partou la anparl de sa, ziska dann bann gran télé. Rénioné lé sovaj mèm ! Sa sé la kriyoté anvèr bann zanimo. Sa sé in n’afèr i fo pa fé pou vréman, mé akoz la pa fé tro dézord dann lo ka Diégo-Garcia é dan lo ka k’la éspas dann Kanada ?
La Fontaine la bien rakont sa dann son fonn-kèr "Bann Zanimo malade la pèst". Kisa la gingn lo kou ? Pa lion, pa lo zours, pa lo lou… sé lo bourik la gingn lo kou. Vi k’li la manz in pyé zèrb dann karo in propriyétèr. Konm di lo fonnkèr : « La kriy Haro déssi lo bourik ! », épi la kine ali.
A ces mots, on cria "Haro sur le baudet !".

Justin