Mésyé, Médam, La Sosyété, koz èk moin sé koz èk in kouyon, mé sé o pyé d’lo mir k’i oi lo bon mason. Mé zami, dann la lang fransèz, néna in kozman-in proverb si zot i vé-I di “fote do griv, I manz lo mèrl” : sa i vé dir sirman griv sé lo promyé shoi é mèrl sé dézyèm. Parèye pou pèshkaval épi banklosh : demoun I koné poisson I rode pèsh kaval, é si I trouv pa I pran banklosh. Mi souvien in marmaye la gingn inn tanure avèk son momon pars afors zoué dann shomin, pèsh kaval l’avé pi é èl la pran banklosh épi konm éskiz la di, li la tronpé. La vièye lété bandé an trantsis . El la di : Kosa ! In zanfan pèshèr I koné pa la diférans rant pèshkaval épi banklosh ? M’aprann atoué moin par dé troi kou d’sintiron… Mi arète la, mé mi invite azot rofléshi in pé é domann azot si zordi in marmaye i gingnré lo kou pou in n’afèr konmsa. Alé ! Mi kite azot é ni artrouv pli d’van. Sipétadyé.