Na inn-dé zour moin la gingn in kouryèl in bon kamarad, in bon l’obsèrvatèr la vi tou sinploman. Li la rapèl amoin in n’afèr bien intérésan ; li la rapèl amoin lo zour mésyé Fillon la vni La Rényon épi mésyé Didier la fé vizit ali komine Tampon. Zot dé té pou anparl lo l’énèrzi ronouvlab é mésyé Didier la di, sa sé in n’afèr bann dinozor i anparl. Lé rigolo in ?

Solman oila, l’énèrzi ronouvlab la pa arète fé son shomin dopi kék z’ané. Dann l’almagn na plin santral pou lo van ! Dann l’amérik galman ! Bann shinoi épi bann z’indien i mète in bonpé moiyin la-dan. Mèm désèrtin péi la fine trap l’oto-sifizans énèrzétik ! Moin la fine anparl azot bann zil El-hiéro otonom pou son l’énèrji prop. Zot i koné la komine Sint-Sizane lé otonom késtyonn l’énèrzi prop.

Zordi mèm bann gran sosyété la fé z’ot bèr avèk bann z’énèrzi fosil, konm total, la désid invésti dann l’énèrzi ronouvlab : kisoi lo l’énèrzi solèr, kisoi lo l’énèrzi éoliene é d’apré son diréktèr zénéral, sé in n’afèr d’avnir.

Mésyé Didier dann tousala ? Sé pa si li ansouvien ankor son kozman moin la mark an-o la. Si li ansouvien pa i fo souf sa dann son trou d’zorèy. I pé dir ali, par ébzanp, Kazimir té in dinozor koulèr z’oranj, gran manzèr globi-bouya dovan l’avnir, é mi pans li té i doi rogard sa kan li lété marmaye. Zordi kisa i tonm pli Dinozor ? Sak lé dann l’énèrzi fosil sansa sak i profèr l’énèrzi prop ronouvlab ? Konm di lo kont : A Dinozor, Dinozor édmi !