Na poin lontan Benoît Hamon la vni La Rényon pou fé la politik pou bann sosyalis bourboné. I prétan dir bononm-la lé dan la gosh parti sosyalis.
Oté ! Séryé lé ga ! Mé moin pèrsonèl, mi konpran pa byin kissa lé a-gosh, kissa lé a-droit vik lo pti bononm lé dépité éropéin é la-ba nana konm in géstyon l’Érop min-dan-la min rant bann soi-dizan gosh épi bann vré droite.

Si mi tronp pa, lé dé band kokin la domann bann Fransé pou vote "oui" pou lo référandome déssi la konstitisyon... Avèk "la konkirans lib épi non fossé", plis "lo règléman Bolkenstein é son plonbyé poloné".

Bann kapitalis i pé ète kontan an avoir toussa dépité pou vanj pou zot. Myé, bann kolonyalis osi i pé ète kontan. Mèm bann rézidi l’ésklavazis i artrouv z’ot kont dann in n’afèr konmsa.

Kossa ? Mi antan d’issi, in pé apré di : Justin, sa in moun i ème grossi sa !
Non, lé pa vré pars in kékshoz, kan lé pti, mi oi ali pti, mé kant li lé gro, mi oi ali gro !
Kossa ? Bin si zot i vé in légzanp, moin na inn pou zot.

Donkalor madam Granmézon, in dépité éropéin, la sèy fé pran in désizyon fé an sort, dann tout l’Érop, i fiks in zour d’souvnir kont la trète bann zésklav épi lésklavaz li-mèm. Té i falé bann dépité té i sign z’ot nom konmsa, lavé in shans pou réissir. Méssyé Hamon la lès la date passé, konm li déssèrtin gran sosyalis la fé parèy.
Alors, l’afèr la foiré épi pou l’Érop, la poin d’zour kont lésklavaz épi la trète bann zésklav. Konm di in moun moin té i koné : déssèrtin droite épi in bann gosh, sé topète pou morète. A-droit konm zozèf a-gosh é a-gosh konm zozèf a-droite !

Justin