Gouvèrnman la désid, kan bann moun i sava pran la rotrète, déssi dé, li va ranplas inn solman : si dé l’amontrèr, inn solman. Si dé pèrséptèr, va anbosh inn. Si dé ziz... étsétéra, étsétéra la ké lo ra. Pou kossa li désid fé in shoz intélizans konmsa ? Sé par rapor, solon li, nana tro fonksionèr, i dépans tro larzan pou pèy azot, donkalor, i fo diminié.

Épi si i fé sa asuiv, in bon koup de tan, v’arive lo zour nora dé foi moin bann fonksionèr. Alor la, i fodra inn i fé travay pou dé ? Zot i kroi in nafèr konmsa lé possib ? Dizon, i di konmsa va sinplifié. Lé sinp in, tèlman sinp, mi demann amoin pou kossa i mazine in n’afèr konmsa arienk zordi ?

Sof ké, dépi k’la mète linformatik in pé partou, dépik la fé bann lékol éspésial pou demoun i travay dann biro, si na moin pou fé, sak na pou fé lé pli difisil, plis tout kalité z’afèr éspésial i fé koméla : moin mi apèl sa : lo travay déssi lo travay... Sa sé in n’afèr k’i mank pa ! Si tèlman nana demoun pou kass z’ot tète pou rod linpossib.

Alor, pou kissa zot i pran d’moun ? Pou lo komansman d’in kouyon ou bien pou in kouyon konplé ? Alé, fé roulé férèr, kontinié konm sa mèm, mé na in zour i apèl démin ! Afors alé a l’o, kalbas i pète.

Justin