Ni koné nana in provèrb près konmsa dann lo lang bann fransé é mi sort antann dann radio i paré kozman-la i égzis près dann tout lang. Donk ni pé dir-sanm pou moin !- la grann sazès bann pèp i pass par bann kozman konmsa.. dé foi la kouyonis osi i pass par la !

Kosa sa i vé dir ozis ? I vé dir i fo pa abizé dsi kékshoz pars sansa ou i pé tonm dann malizé. In l’égzanp ? Abiz pa dsi la mantri pars moman-doné pèrsone i kroi pi aou. Pli pir, nana in moun, dann mon liv léktir, té i kriy toultan : « lo lou ! lo lou ! » é té i déranz demoun pou arien. In zour kan lo lou l’ariv pou vréman, li la kriyé mé pèrsone la pa déranzé pou ède ali.

Kosa zot i anpans zot ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète tazantan, dakor rantre nou.