Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, m’a dir ou in n’afèr. Moin pèrsonèl, mi konpran pa zot, manyèr zot l’apré fé. Pou kosa mi di sa ? Zot nana in moun shé zot-anfin l’été shé zot na poin lontan é la fé in gran parkour avèk zot ! Oila ké la pèrsone nana bon sondaz pou èl, si tèlman ké èl lé dézyèm déyèr Didier. Ala inn pèrsone, d’apré sak zournal i di la fé la-ba Sin-Pyèr l’inion bann gosh. Olèrk zot lé kontan épi zot i rant dann ron, ala ké zot i mète a mongogné z’ot koté. Si mi pé donn aou, épi lé z’ot in konsèy : si li la fé azot in n’afèr d’mal démyé pardoné, konm i di si la pa pou èl, o moins pou zot an avoir l’éspri trankil. I rosanm mon konsèy sar pa suivi… si tèlman z’ot gato lé mal kui. Donk pous pli loin z’ot malèr ! anvoy azot !. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr, mèrsi pou out bon konsèy « pou nout ijyène de vi é nout santé moral » mé m’a dir aou moin lé pa dakor sanm ou. Pou kosa moin lé pa dakor ? Pou la fason k’ou i anparl la gosh ou sinonsa lo bann gosh. Dabor èl la pa fé l’inyon tout la gosh. Na in bann èl la mète a l’ékar konm parti kominis é plis la moityé bann sosyalis groupé dann lo Progré, épi d’ot ankor… mi sar pa di tout lo bann nom. Mèm son parti lo PLR lé pa tout déyèr èl : sa la fine fané konm kan i done grin mayi in bann poul.
In dézyèm z’afèr : ou i parl gosh ! Sa in lojik pou La Frans, la pa in lojik pou nou, La rényon. La prèv lo bann minis k’i di zot lé a gosh ébin in majorité rényoné la vote pou la gosh i rokoné pa zot la-dan. Pou anshévé, souvan dé foi zot na in poinn vizé kolonyalis. Matant kolonyalis avèk nou, sa i fé dé konm ou i koné ! In n’ot afèr : ousa i lé lo program ? Bin na poinn program. Ousa I lé lo program l’inionn la gosh ? O ki d’ bourik ! Okilé lo l’idéolozi d’la gosh ? Na poin ditou. Alor si sé sa k’i apèl la gosh ? Zot lé a gosh ? Oui… mé konm Zozèf a gosh.