I ariv amwin d’dir la késtyonn manzé sé in késtyon d’statézi pou La Rényon konm pou in bonpé bannzil. I’ariv amwin d’dir si ni fé pa lo shoi d’in bon stratézi walala ké zannui v’ariv pou nou. Mi di ossi gouvèrné sé prévoir é si lo gouvèrnman santral par lo moiyin d’inn loi kade i done pa nou lo moiyin pou ranpli noute garde manzé ni pé akiz ali d’traïzon par raporte lo pèp rényoné.

In zour mwin la trouv dann téstaman Dev Virashamy — in gran sitoiyin morissien — in kozman Dev i di-pa tro lontan avan sa mortalité — i fo shak famiye morissiene i plante in pyé frui-yapin dovan son kaz pou anparé an ka la nouritir i ariv a manké. Mi koné in kamarade la touzour di amwin si dann lé o sin-Pol demoune lé pa mor d’fain sé par bann pyé fruyapin. An maron osinonsa otroman i fo ni antrotien bann pyé fruyapin. In tan mi koné bann kamarade la mète a plante sa an maron é mi trouv zot lété bien méritan.

.. Zordi néna bann zofissyél i di dsi la souvrèneté alimantèr la Rényon lé bien avanssé sof dsi lo ri, sof dsi lo blé, é sa sé in gro poin pou nou. Sof galman dsi bann rassine pars bonpé marmaye i yèm pa sa é poitan sa i pé sov anou… Mézami la dsi konm dsi noute manjaye an zénéral gouvèrnman i doi arète fé sanblan. Ni vé in plan, ni vé in loi, pou fèr fass noute lavnir… Pou koué mi di sa ? Sinplomanpoars la manjaye sé kant mèm in bézwin fondamantal é fransh vérité ni viv pa solman avèk l’amour épi lo fré.

A bon antandèr salu !

Justin