Kossa la fé ansanb ? Mwin la domande in kamarade mé li la réponde amwin gouvèrnman l’avé profèr fé sa dann zantiye, pars laba lété pli fassil, demoune té pli pour, é la mèr téi aprète bien pou in projé konmsa... Lété lo tan téi falé dégrenn toute projé La Rényon, pou amontr in pé koko dir bande rényoné, kèl koté brinjèl i sharge, kissa k’i komande dann train-la.

Mi rapèl in tan bonpé d’moune téi anparl klimatiz bande sal de klass pars néna plizyèr moi issi i fé tro sho. Mwin té kont ! Pou koué ? Pars mi trouv té pli sinp rofé l’ané skolèr - l’ané klimatik nou téi apèl sa. Lé possib zordi sa lé pi sifizan pars kan i komans anparl biento va fé pliss karante degré an plin dann lété - i parl mèm sinkant degré. In sinp shanjman l’ané skolèr i sifi pi, sanb pou mwin.
Mé la pa pou sa ni doi dégonflé pars lé ankor possib ékip lékol avèk in pti lizine solèr tèl fasson bande sal lé vivab an plin dan lété. La pa pou sa non pli ni doi dégonf dsu l’ané klimatik pars lé ankor possib modifyé l’ané skolèr tèl fasson ké noute bande marmaye lékol néna in klimatoloji aksèptab pou bande zanfan, bande amontrèr, épi la kominoté skolèr.

Biento la rantré. In moi édmi apré la shalèr va komanss doné. A ! L’avé d’gou pa ékoute nout parti. L’avé d’gou aplik anou lintégrassion dann lékol. L’avé d’gou obliz noute band zanfan éssèye aprande dann in klimatolozi lé pa fé pou sa.

Zordi in pé i apèrssoi zot ane sé inn bourik. Alor kossa i fé astèr ? Lé tan d’ète rézonab kant mèm — A bon ékoutèr, salu.

Justin