Biensir kan ni di dévlopman, ni panss in vré dévlopman. Sé kossa in vré dévlopman ? Mwin la déza antann dir i fo pa konfonn kroissans avèk dévlopman pars sa i vé pa dir mèm shoz. Mwin la fine antann dir galman in PIB élvé sa i vé pa dir forsséman in lékonomi dévlopé. Si ni di noute PIB lé inportan pars sé kékshoz kom 23 milyar lero mé noute péi lé kant mèm pa bien dévlopé. Pou kossa mi di sa ?

Pars ni pé pa dir la mazorité noute popilassion lé assiré d’la satisfakssion son bann bézoin prinssipal… Avèk karante pour san bann pov ? Avèk ankor dissète pour san dmoune dann la mizèr ? Avèk la moityé bann zanfan éné dann in famiye pov ni pé pa dir noute popilassion i trouv shé nou sak i fo pou kontante son bann bézoin éssansyèl.

Sé koi lo bann bézoin éssanssyèl ? Sé lo manzé sifizan an kalité épi an kantité, sé in lozman konm k’i fo, é sé ankor la satisfakssion bann bézoin dann lo domène kiltirèl é dann lédikassion épi la formassion, sé in lanvironeman natirèl korèk, sé bann soin konm k’i fo. Pou sa mi panss nou la bézoin l’égalité épi i fo pa néna in grann diféranss de vi rante inn parti épi in n’ote parti noute popilassio — mi diré i f opa tro linégalité..

Sanm pou mwin ni pé pa dir toussala lé assiré dann noute péi La Rényon é tro d’voiyan o rouz é tropé d’voyan o vèr malgré soissante dsi zané d’départmantalizassion, épi dé réjyonalizassion. Dann noute parti néna plizyèr résponssab k’i di touzour i fo anou in plan ékonomik fé par bann rényoné, pou bann rényoné é sé sa — ni panss — i pé tir anou dann léta d’non dévlopman nou lé d’dan, antouléka dann in léta d’dévlopman insifizan mèm si nou sé in boute inn an parmi bann péi dévlopé.

A kan in léfor koléktif bann rényoné pou mète an èv lo plan ni souète dopi lontan pou noute péi… A bon antandèr salu !

Justin