Avan Macron l’avé Hollande, avan Hollande l’avé Sarkozy, avan Sarkozy l’avé Chirac é avan ankor l’avé Mitterrand é banna la sèye fé kroir anou ni anbèk dann shomin in vré dévlopman durab é nou la pa anbèk ladan ditou. Si tèlman ké zordi ankor noute mal-dévlopman lé konm sak ni koné…

Mézami, sèryèzman, zot i panss bann Prézidan la vni inn apré l’ote, épi bann majorité droite konm gosh, la vni inn apré l’ote, la vny abou mète anou dann shomin in vré dévlopman. Pèrsonèlman mi oi pa in bon kalitatif dann bann pèryode ni koné dopi dé zané é dé zané.

In bon kalitatif noré té fé sorte anou dann réjime néo-kolonyal pou mète anou dann inn pèryode dévlopman durab… Sirésèrtin si ni domann bann shomèr, si ni domann bann jene, épi bann zintéléktyèl, bann andikapé, bann shèrchèr, bann zartiss épi d’ote si zot la rann azot konte La Rényon toudinkou l’avé fé in bon kalitatif pou amenn noute pèp dann la voi in vré dévlopman, sirman zot va réponn anou non.

Pou kossa ? Pars nou la pa kass la shène lo néokolonyalism mèm si ni panssé ni alé kass la shène-la.. Lo Prézidan Macron, plizyèr foi, l’avé anonss l’èr lo dévlopman bann péi loutre-mèr, mé an fète lanonss lété fé, mé lo shanjman la pa arivé.

Si tèlman ké zordi, l’èr ni oi in nouvo Prézidan i sava prèss fini son dézyèm manda, ni oi pa non pli in nouvo dévlopman mète ali an marsh pou amélyor la vi dann noute péi. Macron téi dispoz dë manda pou amenn loutremèr dann shomin lo dévlopman durab mé la réalité lé pa ditou sak ni éspéré.

A bon antandèr, salu !