Mézami, mi yèmré bien ké nou rényoné é anparmi nou sak i sorte ète élu é k’i okipe in plass inportan ni komanss rovandik dann in bon pé domène. Pars, sanm pou mwin, nou lé bordé souvan défoi : bordé par Gouvèrnman franssé, bordé galman par bande gouvèrnman bannzil ni apèl frère osinonsa sère… Si zot lé dann nout kèr, mwin néna konm linpréssion nou lé pa dann sète zot.

Mi diré zot i amenn in sorte réal-politik k’i amenn azot a shoizi gouvèrnman la franss é son zintéré plito ké nou rényoné é noute zintéré… Lé pa rare ni fé apèl la solidarité par raporte noute bande frèr é sèr kissoi kan i ariv in siklone sansa in katastrof toute kalité… Mi vé pa anparl sak i rofèrm azot dann zot égoïssité, é ki pass zot tan a roprosh anou noute solidarité-même kansréti in sinp apèl. Mi vé anparl sak i kiltive de tou-tan la solidarité rante frère é sèr.

Mi sava pa donn bande zégzanpe-é poitan néna – la borde anou konmsi nou lété étranzé par raporte loséan indien alé oir sé nou k’lé issi an plin dann loséan é pa dismil kilomète distanss. Pou ropran in lékspréssion bien koni : i déranj pa zot manz la lène dsi nout do olèrk done anou in kou d’min kan nou lé bordé par in gouvèrnman franssé kissoi gosh konm droite mé touzour animé par léspri kolonyal.

Lé vré ké nou na poin toultan l’atitide k’i fodré avoir. Mèm in pé la sèye plime noute bande fère é sèr, olèrk dévlope in vré stratézi gagnan-gagnan. Zordi konsèy réjyonal i propoz in vré solidarité indianoséanik, é mi éspère noute bande frère é sèr i lèss ar pa tonbé la min tandu. Kanssa nou va atande azote kriye in sèl voi zot kolèr oir anou bordé, é ké nou ossi ni fé parèye par raporte azot ? Ka nsa v’ariv l’èr nou sar ini konm lo sink doi d’in min ?