In fète konm la fète la mizik ? In fète konm lo vin déssanm ? In fète konm katorz zilyète ? Fransh vérité, d’apré mwin la fète pou la somenn kréol lé pli timide, pli rézèrvé, é si wi sava pa bien rodé pou trouvé ou néna linpréssion la fète lé in pé abssan par rapor a d’ote ké sé bann vré fète pou toulbon.

Alor, mi domann amwin kansa la fète la somenn kréol sar in vré fète pou vréman, kansa la fète-la va pète an flèr konm d’ote fète La Rényon. Pé sfèr zot va dir amwin fète-la lé tro nèv éi fo lèss ali lo tan pou li pète an flèr, inn foi pou inn bone foi.

Poitan la lang kréol sé in lang nou la fé é ni pé dir lé z’ot nou la prété. Poitan in lang sé léspréssion — lo promyé manifestassion — lo jénie d’in pèp. Donk lo kréol rényoné sé la marke lo jéni lo pèp rényoné donk i fo fète ali, pou dir ali ni yèm ali, ni mour ali, ni trouv ali gayar, sé dann li ké ni koné ésprime noute panssé, noute santiman, noute sansibilité, noute manyèr viv toute bann gran, zévènman d’la vi.

Mi panss nou lé ankor loin d’in bone fète la lang kréol mé pti lanp, pti lanp in zour nou v’ariv fèr sa é zourla, kan la somenn kréol va pète an flèr konm in vré gran fète, mwin lé sirésèrtin noute toute va apréssyé sète afèr-la.

A bon antandèr salu !

Justin