Matant Zélida la ékrir Justin :
Mon shèr nové, mon spès salté, rouz de fon dovan létèrnité,
Mi pans zot i sort trouv in zo pou mord. Oui, in zo pou mord ! Ou i koné bien kosa mi anparl ? Mi anparl lo mizé la méditérané bana la rouvèr la-ba dan la vil Marsèy. Moin lé sir bann rouj-de-fon la fine batiz sa la MCUR la méditérané... Poitan sa la pa lo mèm zafèr vi k’bann péi i fé lo tour la mèr Méditérané nana plizyèr milyé d’zané konm istoir komine, épi Marsèy, kapital kiltirèl l’Erop pou sèt ané, sa in n’afèr inportan... Donk, si soisant mil pèrsone la déranz pou oir mizé-la, sé ké sa sé in n’afèr inportan pou bann zéropéin.
Moin pèrsonèl mi pans i fo konpar dé shoz lé konparab : in MCUR dsi in pti galé dan loséan Indien avèk in mizé la mèr Méditérané ; rokoné zot mèm, na poin arien pou oir inn ansanm l’ot. Arzout èk sa, kèl rotonbé ékonomik ni pé aspéré isi, alé oir la-ba, d’apré sak i di, zot nana in bon konsékans pou aspéré pou zot lékonomi. Zot i souvien la fab La Fontaine lo krapo té i vé gonf ali grosèr in bèf ? Mi di pa zot plis. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Vi koné matant, la MCUR-la, sa sé in lidé Parti kominis rényoné sa. Pou kosa ni vé fé sa ? Pars si ni viv pa dsi l’bor la mèr Méditérané, ni viv an plin dan loséan Indien, é kroi amoin, loséan Indien lé antouré avèk in bann péi nana in sivilizasyon rish épi i port dsi plizyèr milyé d’zané galman. Bordaz loséan nana l’Inn, nana la kot l’Afrik, nana Madégascar, l’Arabi, l’Iran, l’Indonézi, é mi arèt la. Arzout èk sa, La Rényon té in koloni la Frans, donk konm in pé i di, nou sé in pti galé dan loséan, mé dsi pti galé-la, bann pèp i sort sink sis landroi diféran la rankontré. Nou na zansète l’Erop, l’Afrik, Madégascar, la Chine, l’Inn… nou la pans, in sityasion konm sa, par son listoir, par son zéografi, par son démografi, i mérité bien in MCUR.
Késtyonn rotonbé pou lékonomi, ni doi kont dsi bann konsékans intérésan ; l’Erop lé loin, mé na touris i sort l’Erop pou vni isi. L’Inn lé pré, l’Afrik di sid lé pré, la Chine lé pa loin, bann péi l’Arabi la pa loin... donk, akoz banna i vien ar pa vizit anou, é la MCUR, sa in bon zoutiy pou dévlop nout kontak avèk bann péi déor. I sifi ké ni oi in pé pli loin ké lo bout nout né. Tok ! Pran sa pou ou !

 Justin