Lé ga, zordi mi vé koz in pé dsi la lang bann fransé… Mi antan déza tré bien d’isi dann mon zorèy inn-dé malfondé apré di : Justin, akoz ou i sava mèl zafèr i rogard pa ou ? Ou pass out tan pou ékri dann kréol rényoné, ou i mète an kréol rényoné bann tèks kisoi dann la lang fransé, kisoi dann in lang kréol. Alor lèss sa tonbé ! Pa bézoi n fé lo doktèr dann maladi ou i koné mèm pa.

Moin mi di azot : Dousman ! Bouj pa l’bato ! Lang fransé i intérès amoin, mèm li konsèrn amoin. Pou kosa ? Inn pars mi rèv in bilangism fransé-kréol rényoné bien azansé. Dé : moin la zamé rofiz aprann fransé moin-an kotrèr mi yèm bien mé la pa pou sa mi krash dsi nout kréol rényoné. In troizyèm rézon ? Lo lang bann fransé sa lé bokou parlé dsi la tèr é mi sava pa zète in lang moin la fine travaye dé z’ané é dé z’ané pou aprann ali, pou konprann ali, pou lir bann liv ékri dann lang-la. Arzout èk sa, lang-la i konsèrn mon zanfan, mon pti zanfan, mèm tout mon bann dalon rényoné. Alor, dousman avèk moin !

In n’ot rézon ankor zot i dovinré mèm pa : la lang bann fransé i doi amoin. Pou kosa ? Pars li la iz mon mémoir, mon matyèr griz, mon l’énèrzi in nonm dé z’èr mi pé mèm pa kalkilé. Mi diré mèm, lang-la i doi amoin domaz intéré. Zot i pans mi plézant ? Pa ditou, mi koz sèryé konm in pap antouré avèk son bann soupap . Alor, z’ot kritik, z’ot kasaz ti-boi, z’ot kasaz lé kui ébin sa i fé amoin ni fré, ni sho, ni tyède.

O fète pou kosa mi di sa ? Pars zordi mi sort aprann in nouvèl, pétète zot i koné déza. El i port dsi lo zakor lo partisip pasé épi lo minis l’édikasyon nasyonal. Konm nou minis-la i koné bann règ dsi lo zakor lo partisip pasé avèk lo zoksylyèr avoir konm avèk lo zoksilyèr ète. Li koné sa par kèr konm nou mèm mé ala lo problèm tout bann règ i soufèr bann zéksépsyon é sa sé in n’afèr i fout anou d’dan konm la fé fèr lo minis inn tronpète.

Alé, ni artrouv pli d’van é si mi pans m’a avoye lo minis in pti liv gramèr lontan : A ! La gramèr lontan na poin arien i bate sa !