D’ordinèr, in minis, sa i voiyaz an vitès ; Si tèlman ké kan ou i kroi li lé ankor la, li la fine kol shomin alé. Mésié lo minis l’Outre-mèr Lurel, so kou isi, lété konm ki diré pa présé. Li la sort La Rénion, li la pran bato la gèr pou li alé Tromlin. Kan li la sort Tromlin, i diré li la parti Eropa. Mi koné pa si li la parti Juan de Nova, ou in n’ot ankor, mé pou bat karé, li la bat karé. Konm in moun té pa présé artourn dann Pari... Romark, mi konpran pars l’èr lé pa bon pou lo prézidan èk son gouvèrnman sé tan isi. Donk, li la profit pou alé proméné dann bato é prann in pé l’èr. In n’afèr bien inosan ? Pa sir !

Mé antansion, i ariv k’in n’afèr a popré inosan, aparaman, lé riskab azout ankor difikilté l’èr ou la pa bien bézoin. Pou kosa mi di sa ? Pars Tromlin la pa bien gran — in kilomèt karé par la ! —, mé na troi péi i diskit pou sa : la Frans, l’il Moris épi Madégaskar. Donk zot i antrovi a popré pou kosa n’arté pli préférab fé in pé atansion. Mèm pou Eropa, pars la Frans la kapar sa pou li, mé konm Juan de Nova, la Frans avèk Madégaskar lé an diskision pou sa, sré mèm an dispit.

Donk, sanm pou moin, plito ké fé lo fièr, anroul aou dann drapo troi koulèr, amont out patriotism misklor, lété pli préférab diskité, fé marsh la diplomasi, épi trouv in bon térin l’antant. Demoun i èm la pé i fé konm sa é pa konm gouvèrnman fransé la fé. A moins ké sa sé in manièr pou détourn l’atansion d’moun.

NB : Moin la lir zournal Moris épi la près Madégaskar. Mi asir azot, banna la pa aprésié la provokasion.

Justin