Mi sort lir in lékrivin brézilyin, Jorge Amado, “Linvitasyon a Bahia”.

Zot i koné, dann Brézil navé zamérindyin kann Portugé larivé ; la fé nir zésklav dépi Lafrik, Angola é ankor dot rézion.

Si vi rogard byin koman lo pèp bréziliin la konstityé é ti konpar èk sak la Rényon, ni pé trouv dé-troi resanblans dan lo métisaz ; nou lé pi blan, nou lé pi noir, nou lé mélanzé ; nou antan sa dann parol nout bann maloya.

O Brézil, banna i dans kapoéra, i koréspon égzaktoman nout moring, somanké mèm lo manzé èk tomat piman poison i doi osi èt in pé parey.

San konté, a koté pratik krétyin, bann zofis kult lespri afrikin, tyé kok, bouk, fé koul lo san, sakrifis zanimo, ni artrouv sa osi ; dans, tambour, ritm.

La vi an plin èr, port paké droit si la tèt, zoué balon déor ninport ou.

Zot i rapèl Pelé, gran fotbalèr la komans zoué si la plaz.

A nou osi, kan nou té marmay, nou té kour déryèr in panplemous dan in karo zèrb ; nou la pa bézoin in Parc des Princes.

Si ou parl sinkrétism, bann zartis lé kapab laba fé in léstati la vièrz èk vizaz afrikin…

Na in kamarad té i di a moin lot zour, nou osi nou na nout vièrz noir, la Rivièr dé Plui.

Amado i ékri : « nout zonbri lé an Afrik » pars mazorité pèploman i sort Lafrik.

A nou la Rényon, nou na péploman i sort pa ryink Lafrik, ou na osi Lind, la Shin, Madagaskar… nout zonbri lé ramifyé plisièr ti brans ; i sar Lafrik, lot Lind, lot en Shin, lot péi madékas.

Nout zonbri la miltiplyé.

Nou na plizyèr zonbri alor !

 Justin